उहाँले मनहरीमा रहेका करिब ११–१२ हजार भूमिहीनको समस्या समाधानका लागि प्रतिनिधि सभामा कानुनी जटिलता फुकाउन पहल गरेको उल्लेख गर्नुभयो। “भूमि आयोगमार्फत धनीपुर्जा वितरण गर्ने कानुनी व्यवस्था बनेको छ। गाउँपालिकाले समयमै लगत संकलन गरेर पठाउनुपर्छ, यसका लागि स्थानीयस्तरबाट पनि दबाब दिनुपर्छ,” उहाँले जोड दिनुभयो।

भेटघाटका क्रममा एमाले मनहरीका अध्यक्ष नवीन सुवेदीले बर्तौलाकै पहलमा रुपाचुरी–बालुभञ्ज्याङ खानेपानी आयोजना अघि बढेको र मनहरी–रुपाचुरी सडक स्तरोन्नतिको जिम्मा पनि एमालेले लिने बताउनुभयो।

मनहरी–६ रुपाचुरीकी लक्ष्मी थिङ र सुनाचुरीका स्थानीयले संसदमा जग्गाको धनीपुर्जा र मध्यवर्तीको समस्याबारे आवाज उठाएको भन्दै बर्तौलाको प्रशंसा गरे। उनीहरूले राप्ती खोलाको तटबन्धन, बस्ती संरक्षण तथा निकुञ्जका कडा नियमबाट राहतको माग राखेका छन्।

अघिल्लो कार्यकालमा प्राप्त दुईवटा बजेटमार्फत खानेपानी, पूर्वी राप्ती तटबन्धनलगायत क्षेत्रमा उल्लेख्य काम भएको दाबी गर्दै बर्तौलाले बाँकी अधुरा योजना पूरा गर्न पूर्ण कार्यकालका लागि सूर्य चिन्हमा मतदान गर्न आग्रह गर्नुभयो। आजको निर्वाचन अभियानमा एमाले नेता बिरेन्द्र डिसी, रामचन्द्र घिमिरे, रघुनाथ लामा र शालिक बानियाँको सहभागिता रहेको थियो।