जिल्ला तहका नेताहरु बैठक तथा कार्यक्रममा कसलाई प्राथमिकता दिने भन्ने विषयमै अन्योलमा पर्ने गरेका छन् । तल्लो तहमा काम गर्ने कार्यकर्ताहरुले भने योगदान र क्षमताभन्दा पनि समायोजनका आधारमा पद बाँडफाँड भएको गुनासो गरेका छन् ।

मकवानपुरबाट केन्द्रीय सदस्य रहेका नेताहरुमा विरोध खतिवडा, कुमारी मोक्तन, मुनु सिग्देल, विजय गौतम, प्रेमबहादुर पुलामी, घनप्रसाद गौतम, मानकुमारी पाख्रिन, मिना लामा, बालकृष्ण चौलागाईं, देवनाथ दुलाल, प्रलाद लामिछाने, कृष्ण घलान, जीवन लामा, गोमा तिमल्सिना, रामचन्द्र बल, सर्केश घलान, गौतम बुद्ध लामा, भीम पाख्रिन, ध्रुवबहादुर भुजेल, किशोर टन्डन, किशोर बर्तौला, गणेश विक, यादव गजुरेल, राममाया पाख्रिन, तिर्थमाया पाख्रिन, भुवन विष्ट, रामहरि सुवेदी लगायत ४५ जना रहेको पार्टीले जनाएको छ । केही केन्द्रीय सदस्य जिल्ला बाहिर रहेकाले सबै नाम सार्वजनिक हुन बाँकी रहेको जानकारी जिल्ला संयोजक भीम पाख्रिनले दिएका छन् ।

पार्टीका जिल्ला संयोजक तथा केन्द्रीय सदस्य भीम पाख्रिनले भने धेरै घटक मिलेर बनेको पार्टी भएकाले केन्द्रीय सदस्यको संख्या ठूलो हुनु स्वाभाविक भएको दाबी गरे । “धेरै घटकहरु मिलेर बनेको पार्टी हो, त्यसैले ४५ जना केन्द्रीय सदस्य हुनु असामान्य होइन,” उनले भने, “सबै क्षमतावान र दक्ष हुनुहुन्छ ।” उनले पार्टीको महाधिवेशनपछि केन्द्रीय सदस्यको संख्या घट्ने पनि बताए ।

यसैबीच, मकवानपुरमा फागुन २१ गते हुने प्रतिनिधिसभा निर्वाचनका लागि क्षेत्र नम्बर १ बाट विजय गौतम र क्षेत्र नम्बर २ बाट लबशेर विष्ट उम्मेदवार बनेका छन् । तर उम्मेदवार जिताउने अभियानमा सक्रिय नदेखिएका व्यक्तिहरु केन्द्रीय सदस्यको हैसियतमा अगाडि आउँदा मतदाता मात्र होइन, नेता तथा कार्यकर्ता समेत असन्तुष्ट देखिएका छन् ।