मीनाकुमारी लामा र अनिल बानियाँको सामाजिक संवेदनशीलता: थामी परिवारलाई सहयोग

नेपाल कलम संवाददाता

११ मंसिर २०८१, मंगलवार प्रकाशित

हेटौंडा उपमहानगरपालिका-१८ थामीटोलका गरिब परिवारका पशुपति थामीलाई स्थानीय सरकारले सहयोग गर्ने निर्णय गरेको छ। आर्थिक विपन्नताका कारण उपचार गर्न असमर्थ रहेका थामीको स्वास्थ्य समस्यालाई मध्यनजर गर्दै नगर प्रमुख मीनाकुमारी लामा र वडा अध्यक्ष अनिल बानियाँले व्यक्तिगत पहल गरेका हुन्।

मंगलबार बिहान थामीको घरमै पुगेर उनीहरूले तत्काल उपचारका लागि आवश्यक प्रबन्ध मिलाएका छन्। सिएमसी चुरेहील अस्पतालमा निःशुल्क उपचार गराउने व्यवस्था मिलाइएको छ। यसका अलावा थामी परिवारलाई दैनिक खाद्यान्न र अन्य आवश्यक सहयोग समेत उपलब्ध गराइएको छ।

पशुपति थामी परिवार लामो समयदेखि आर्थिक संकटमा रही आएको बताइन्छ। उनीहरूसँग उपचारको लागि पर्याप्त स्रोत साधन थिएन। यही परिस्थितिलाई मध्यनजर गर्दै स्थानीय सरकारले तत्काल सक्रिय भई सहयोगको हात बढाएको हो।

नगर प्रमुख मीनाकुमारी लामाले भनिन्, “हाम्रो प्रमुख कर्तव्य नै जनताको सेवा र कल्याण गर्नु हो। कुनै पनि नागरिक स्वास्थ्य समस्याका कारण पीडामा बस्न हुँदैन।” त्यस्तै वडा अध्यक्ष अनिल बानियाँले पनि यस्ता सामाजिक दायित्वलाई महत्व दिइन्छ भन्दै थामी परिवारलाई पूर्ण सहयोग गर्ने प्रतिबद्धता व्यक्त गरे।