‘स्त्री शक्ति कमजोर छैन, कमजोर छ त केवल हामीभित्रको दृष्टिकोण र मानसिकता,’ उनले भनेका छन्, ‘त्यसैले आफ्नो मनोबल उच्च राखौँ, स्त्री शक्तिको सम्मान गरौँ ।’

दशैँमा शक्तिको उपासना गरेपछि तिहारमा लक्ष्मीको आराधना गर्ने धार्मिक परम्परालाई स्मरण गराउँदै उनले नारी सम्मानलाई पूजा र अनुष्ठानमा मात्र सीमित नराखी दैनिक जीवन र सामाजिक व्यवहारमा समेत लागू गर्नुपर्ने सन्देश दिएका छन् । उनले शुभकामना सन्देशमा मनुस्मृतिको श्लोकसमेत उद्धृत गरेका छन् ।

‘यत्र नार्यस्तु पूज्यन्ते रमन्ते तत्र देवताः । यत्रैतास्तु न पूज्यन्ते सर्वास्तत्राफलाः क्रियाः ।।’

यसको अर्थ जहाँ नारीको सम्मान हुन्छ, त्यहाँ देवताको बास हुन्छ र जहाँ नारीको सम्मान हुँदैन, त्यहाँ गरिएका सबै शुभकर्मसमेत निष्फल हुन्छन् भन्ने रहेको उनले उल्लेख गरेका छन् ।

महिला सम्मानलाई औपचारिकता र धार्मिक अनुष्ठानमा मात्र सीमित नराखी व्यवहारमै उतार्नुपर्नेमा जोड दिँदै मुख्यमन्त्री थापामगरले महिला सम्मानमा समर्पित तिहार नारी उत्थानको कडी बन्ने विश्वास व्यक्त गरेका छन् ।

उनले लक्ष्मीपूजाको अवसरमा समस्त नेपालीमा सुख, शान्ति, समृद्धि र खुसीको कामना गर्दै शुभकामना व्यक्त गरेका छन् ।