हेटौंडा – बागमती प्रदेश सरकार र प्रतिपक्षी दलहरूबीच भएको वार्तापछि प्रदेशसभामा देखिएको गतिरोध अन्त्य हुने भएको छ। प्रतिपक्षी दलका सांसदहरूका योजनाहरूमा बजेट वृद्धि गर्ने सहमतिसँगै प्रदेशसभाको अवरोध हट्ने सम्भावना बढेको हो।
मुख्यमन्त्री निवासमा आयोजित बैठकमा आगामी आर्थिक वर्ष २०८१/८२ को बजेटमा प्रतिपक्षी सांसदहरूका योजनाहरूमा रकम थप गर्ने सहमति भएको एक सहभागी सांसदले जानकारी दिए। यसअघि प्रमुख प्रतिपक्षी दल नेपाली कांग्रेस र राष्ट्रिय प्रजातन्त्र पार्टीलगायतका दलहरूले बजेट असन्तुलित रहेको भन्दै बिहीबारको प्रदेशसभा बैठक अवरुद्ध गरेका थिए।
नेपाली कांग्रेसका प्रमुख सचेतक गोविन्द लम्सालका अनुसार सरकारले विकास बजेट बढाउने प्रतिबद्धता जनाएको छ। नेकपा एमालेका प्रमुख सचेतक मधुसुदन पौडेलले शनिबार बस्ने मन्त्रिपरिषद् बैठकबाट प्रतिपक्षका मागहरू सम्बोधन गर्ने निर्णय हुने जानकारी दिए।
पौडेलका अनुसार प्रदेशसभाको अवरोध हटाउने र असार १२ गतेभित्रै बजेट पारित गर्ने विषयमा पनि दलहरूबीच सहमति भएको छ। यो समझदारीले बागमती प्रदेशको बजेट प्रक्रियामा देखिएको अवरोध हट्ने र आगामी आर्थिक वर्षको बजेट समयमै पारित हुने अपेक्षा गरिएको छ।
श्रमिक अधिकारको संरक्षण र रोजगारी विस्तारमा जोड: मुख्यमन्त्री बानियाँ
चितवनमा दोस्रो संस्करणको ‘चितवन अटो शो २०२६’ सुरु, ५० करोड कारोबार लक्ष्य
