हेटौंडा खानेपानी व्यवस्थापन बोर्डले आर्थिक वर्ष २०८०/८१ मा उल्लेखनीय प्रगति हासिल गरेको छ। मंगलबार सार्वजनिक गरिएको प्रगति विवरण अनुसार, बोर्डले हाल दैनिक ३ करोड ५७ लाख लिटर पानी उत्पादन गरी २७,७२१ धारामार्फत १ लाख ६० हजारभन्दा बढी नगरबासीलाई सेवा पुर्याइरहेको छ।
बोर्डका अध्यक्ष प्रताप बिष्टले जानकारी दिए अनुसार, २०७० साल जेठ ८ गतेदेखि हेटौंडाको नगरक्षेत्रभित्रको खानेपानी व्यवस्थापन बोर्डले गर्दै आएको छ। हाल हेटौंडा उपमहानगरपालिकाभित्र बसोबास गर्ने नगरबासीहरूलाई दैनिक औसत ७ देखि ८ घण्टा पानी वितरण गरिरहेको छ।
गत आर्थिक वर्षमा बोर्डले १,४९८ नयाँ धारा जडान गरेको छ भने विभिन्न उपभोक्ता समितिहरूबाट २,३२५ धारा हस्तान्तरण भई आएका छन्। यसले गर्दा कुल धारा संख्या २७,७२१ पुगेको छ।
आर्थिक पक्षमा पनि बोर्डले उत्साहजनक नतिजा देखाएको छ। यस वर्ष १५ करोड ४ लाख ३६ हजार ४७९ रुपैयाँ आन्तरिक आय संकलन गरेको छ, जुन वार्षिक लक्ष्यको १०२.७५ प्रतिशत हो। यसमध्ये पानी महसुल संकलनबाट मात्र १३ करोड ५८ लाख २५ हजार रुपैयाँ संकलन भएको छ।
बोर्डले पूँजीगत खर्चतर्फ पनि ठूलो लगानी गरेको छ। कुल १० करोड ५२ लाख रुपैयाँ खर्च गरिएको छ, जसमध्ये पाइप खरिदमा २ करोड खर्च भएको छ। यसबाट ४९,२०१ मिटर नयाँ पाइपलाइन विस्तार गरिएको छ भने २३,६८० मिटर पुरानो जीर्ण पाइप परिवर्तन गरिएको छ।
बोर्डका कार्यकारी निर्देशक विष्णु प्रसाद सापकोटाले यस वर्ष धेरै महत्वपूर्ण परियोजनाहरू सम्पन्न गरिएको बताए। वडा नम्बर ८ मैदाटोल र मकवानपुरगढी गाउँपालिका वडा नम्बर ४ सामरीमा समवेल निर्माण गरी प्रतिदिन ७५ लाख लिटर थप पानी उत्पादन गरिएको छ। साथै, वडा नम्बर १८ हर्नामाडीमा शाखा कार्यालय स्थापना गरी सेवालाई विस्तार गरिएको छ।
समग्रमा, हेटौंडा खानेपानी व्यवस्थापन बोर्डले गत वर्ष उल्लेखनीय प्रगति हासिल गरेको छ र आगामी दिनमा थप सुधार र विस्तारका योजनाहरू अघि सारेको छ।
बागमती प्रदेशमा संविधान दिवस: विविध कार्यक्रमसहित ४ दिने उत्सव
रैथाने बाली संरक्षण र हाट बजार सञ्चालनमा प्रदेश सरकारको सहयोग: मन्त्री श्रेष्ठ
