गत साता परेको अविरल वर्षाका कारण मकवानपुरको थाहा नगरपालिकामा व्यापक क्षति भएको छ। असोज ११ र १२ गते आएको बाढी र पहिरोले नगरपालिकाका २६ वटा खानेपानी आयोजना प्रभावित भएका छन्।
नगरपालिकाले तयार पारेको प्रारम्भिक प्रतिवेदन अनुसार, १८ वटा खानेपानी इन्टेक र २४ वटा रिजर्भ ट्याङ्कीमा क्षति पुगेको छ। यसका साथै, १६ हजार १७० मिटर पोलिथिन पाइप र एक हजार ३ सय २४ मिटर जीआई पाइप पनि बाढीले बगाएको वा क्षतिग्रस्त बनाएको छ।
थाहा नगरपालिकाका मेयर विष्णु विष्टका अनुसार यस प्राकृतिक विपत्तिबाट करिब १ करोड ६३ लाख रुपैयाँ बराबरको क्षति भएको अनुमान गरिएको छ। नगरपालिकाका सवइन्जिनियर सीताराम ढकालले दिएको जानकारी अनुसार, इन्टेकहरुमा करिब ९ लाख रुपैयाँको क्षति भएको छ भने रिजर्भ ट्याङ्कीहरुमा १ करोड ३१ लाख ७५ हजार रुपैयाँको क्षति पुगेको छ। त्यसैगरी, पोलिथिन पाइपमा २० लाख १७ हजार ४५१ रुपैयाँ र जीआई पाइपमा २ लाख १० हजार ४६६ रुपैयाँ बराबरको क्षति भएको उनले बताए।
नगरपालिकाका सूचना अधिकारी सुरज कुमार भुजेलले जानकारी दिए अनुसार, क्षतिको यो मूल्याङ्कन नगरपालिकाका सबै १२ वटा वडाहरुबाट संकलित तथ्याङ्कमा आधारित छ। उनका अनुसार, क्षतिग्रस्त संरचनाहरूको पुनर्निर्माणका लागि पालिकासँग पर्याप्त बजेट नभएकाले खानेपानी डिभिजन, सम्बन्धित मन्त्रालय र विभागहरूसँग सहयोगको अपिल गरिएको छ।
यस घटनाले स्थानीय बासिन्दाको दैनिक जीवनमा गम्भीर असर पारेको छ। नगरपालिकाले क्षतिग्रस्त संरचनाहरूको शीघ्र मर्मत र पुनर्निर्माणको लागि सरकारी तथा गैरसरकारी निकायहरूसँग सहयोगको आग्रह गरेको छ। स्थानीय अधिकारीहरूले यस समस्याको समाधानका लागि प्राथमिकताका साथ काम गरिरहेको बताएका छन्।
बागमतीमा सर्वदलीय बैठक, राहत–उद्धार जारी राख्ने निर्णय
भोटेकोशी बाढी प्रभावित क्षेत्रमा वैकल्पिक विद्युत् पहुँच विस्तार
मुख्यमन्त्री थापामगरको विश्वासको मतमा राप्रपाभित्र दुई धार
मन्त्रीको आगमनबारे गलत सन्देश फैलाइएको भन्दै सांसद गौतमको आपत्ति
मिटरब्याज पीडितद्वारा न्यायको माग गर्दै हेटौंडामा विरोध प्रदर्शन
