मकवानपुरको राक्सिराङ र मकवानपुरगढी गाउँपालिकामा पछिल्ला वर्षहरूमा चट्याङजन्य प्रकोपको जोखिम बढिरहेको छ । यस क्षेत्रमा चट्याङका कारण वार्षिक रूपमा मानवीय तथा भौतिक क्षति हुँदै आएको छ ।
बागमती प्रदेशको आन्तरिक मामिला तथा कानुन मन्त्रालयले सोमबार हेटौंडामा आयोजना गरेको अन्तर्क्रिया कार्यक्रममा चट्याङ न्यूनीकरणका लागि प्रविधिको प्रयोगमा जोड दिइएको छ । दक्षिण एसियाली चट्याङ सञ्जालका अध्यक्ष डा. श्रीराम शर्माले चट्याङ सम्बन्धी विभिन्न पक्षबारे कार्यपत्र प्रस्तुत गर्नुभयो ।
प्रदेशका आन्तरिक मामिला तथा कानुनमन्त्री सुरजचन्द्र लामिछानेका अनुसार प्रदेशका विभिन्न जिल्लामा चट्याङका कारण धनजनको क्षति बढ्दो क्रममा रहेको छ । उहाँले चट्याङ न्यूनीकरणका लागि सचेतना कार्यक्रम महत्त्वपूर्ण रहेको बताउनुभयो । साथै चट्याङको उच्च जोखिम भएका पालिकामा सचेतना र प्रविधि दुवैको प्रयोगका लागि प्रदेश सरकारले चालु आर्थिक वर्षमा बजेट विनियोजन गरेको जानकारी दिनुभयो ।
मन्त्रालयका उपसचिव सुरेश खनालका अनुसार पहिलो चरणमा मकवानपुरगढी गाउँपालिकाका सामुदायिक भवन, विद्यालय र स्वास्थ्य संस्थामा अर्थिङ राखिने छ ।
प्रदेश सरकारले चालु आर्थिक वर्षमा अर्थिङका लागि २० लाख र सचेतना कार्यक्रमका लागि ५ लाख रुपैयाँ छुट्याएको छ । राक्सिराङ गाउँपालिकामा पूर्वचेतावनी प्रणाली राखिने र त्यसको अनुभवपछि अन्य क्षेत्रमा विस्तार गरिने योजना रहेको छ । पूर्वचेतावनी प्रणालीले १५ देखि ३० मिनेट अघि नै सूचना दिने भएकाले चट्याङबाट बच्न सहज हुने विश्वास गरिएको छ ।
बागमतीमा सर्वदलीय बैठक, राहत–उद्धार जारी राख्ने निर्णय
भोटेकोशी बाढी प्रभावित क्षेत्रमा वैकल्पिक विद्युत् पहुँच विस्तार
मुख्यमन्त्री थापामगरको विश्वासको मतमा राप्रपाभित्र दुई धार
मन्त्रीको आगमनबारे गलत सन्देश फैलाइएको भन्दै सांसद गौतमको आपत्ति
मिटरब्याज पीडितद्वारा न्यायको माग गर्दै हेटौंडामा विरोध प्रदर्शन
