संघका अध्यक्ष बालगोपाल कँडेलका अनुसार महोत्सवले निर्माण सामग्री उद्योगी, बिक्रेता र प्रयोगकर्ताबीच समन्वय गराउनुका साथै उत्पादित वस्तुको बजार प्रवर्द्धन, गुणस्तरीय प्रतिस्पर्धाको विकास, र निर्माण व्यवसायसँग सम्बन्धित समस्या, अवसर र चुनौतीबारे अन्तरक्रिया गर्ने उद्देश्य राखेको छ।

अध्यक्ष कँडेलले महोत्सवमा निर्माण क्षेत्रमा प्रयोग हुने अत्याधुनिक उपकरण र निर्माण सामग्रीको प्रदर्शनी, बिक्री र प्रदर्शनमा विशेष जोड दिइने बताए। महोत्सवमा निर्माण उपकरण, सामग्री, औद्योगिक उत्पादन, स्थानीय उत्पादन, र हस्तकलालगायतका सामग्रीका ३५० वटा स्टल रहनेछन्।

स्थानीय स्टललाई ५० प्रतिशतसम्म शुल्क छुट दिने संघले जनाएको छ। साथै, महोत्सवमा गायन, मनोरञ्जनात्मक कार्यक्रम, र जिल्लाबाहिरका १०० भन्दा बढी स्टलको सहभागिता रहने अनुमान गरिएको छ।

करीब १ करोड ३ लाख रुपैयाँको लागतमा सम्पन्न हुने महोत्सवले १ करोड १७ लाख रुपैयाँ आम्दानी गर्ने संघको अनुमान छ।

महोत्सवलाई सफल बनाउन अध्यक्ष कँडेलको संयोजकत्वमा २११ सदस्यीय मूल आयोजक समिति र विभिन्न उपसमितिहरू गठन गरिएको छ। संघका अनुसार महोत्सवले निर्माण व्यवसाय र आर्थिक गतिविधिमा थप योगदान पुर्याउने लक्ष्य राखिएको छ।