जिल्ला जनस्वास्थ्य कार्यालय मकवानपुरका प्रमुख कृष्णबहादुर मिजारका अनुसार खोप अभियानको शुभारम्भ मकवानपुर गढी गाउँपालिकास्थित चण्डिका माविबाट गरिनेछ। यस अभियानले कक्षा ६ देखि १० सम्मका छात्राहरू र विद्यालय नजाने १० देखि १४ वर्षका छात्राहरूलाई लक्षित गरेको छ।

कुल ३५० खोप केन्द्र सञ्चालन गरिने यो अभियानअन्तर्गत विद्यालय लक्षित २४० र अन्य ११० खोप केन्द्र रहनेछन्। अभियानका लागि ३६७ खोप सेसन सञ्चालन हुने र ३६७ जना तालिमप्राप्त स्वास्थ्यकर्मी तथा ७३४ जना स्वयंसेवक परिचालन गरिनेछ।

प्रत्येक खोप केन्द्रमा १ जना स्वास्थ्यकर्मी र २ जना स्वयंसेवक खटाइनेछ। खोप कार्यक्रमबाट ९० प्रतिशत किशोरीलाई खोप उपलब्ध गराउने लक्ष्य राखिएको छ। लक्षित समूहका छात्राहरूलाई अनिवार्य रूपमा खोप कार्यक्रममा सहभागी गराउन अभिभावक र विद्यालयलाई आग्रह गरिएको छ।