नेपाल पत्रकार महासङ्घ मकवानपुरका अध्यक्ष बालकृष्ण अधिकारीले पत्रकारसहित सम्पूर्ण नागरिकको सुरक्षा सुनिश्चित गर्न राज्यलाई आग्रह गरेको छ। साथै, आम नागरिकले शान्ति र सुरक्षा महसुस गर्न सक्ने वातावरण तयार गर्नुपर्नेमा जोड दिएको छ।

नेपाल पत्रकार महासंघ मकवानपुरको आयोजना तथा पत्रकार महासंघ बागमती प्रदेशको समन्वयमा आज हेटौंडामा पत्रकार हत्याविरुद्ध विरोध प्रदर्शन गरिएको हो। समाचार संकलनका क्रममा पत्रकारको हत्या भएको र आम सञ्चारमाध्यममाथि आक्रमण गरिएको विरोधमा मकवानपुरका पत्रकारहरू पनि देशव्यापी आन्दोलनमा सहभागि भएका छन्।

हेटौंडाको पल्पसा सभागृहबाट सुरु भएको पत्रकारहरूको प्रदर्शन मकवानपुर उद्योग वाणिज्य संघ, पिपलबोट, बुद्धचोक हुँदै स्कुरोडमा पुगेर सभामा परिणत भएको थियो।

शुक्रबार राजावादी प्रदर्शनका क्रममा एभिन्युज टेलिभिजनका पत्रकार सुरेश रजकको मृत्यु भएको थियो। उनले भिडियो खिचिरहेको घरमा राजावादी प्रदर्शनकारीहरूले आगो लगाएपछि जलेर उनको मृत्यु भएको थियो। सो घटनाको विरोधमा नेपाल पत्रकार महासंघले हेटौंडामा प्रदर्शन गरेको हो।

संयोगवश, आज नेपाल पत्रकार महासंघको स्थापना दिवससमेत रहेकाले महासंघले पूर्वनिर्धारित कार्यक्रम स्थगित गरी विरोध प्रदर्शन गरेको हो।

कार्यक्रममा नेपाल पत्रकार महासंघ बागमती प्रदेशका संस्थापक अध्यक्ष प्रताप विष्ट, महासंघ बागमती प्रदेशका उपाध्यक्ष हरि हुमागाईं, प्रेस युनियन मकवानपुरका अध्यक्ष सुवास विडारी, प्रेस चौतारी मकवानपुरकी अध्यक्ष सरिता दाहाल, गैरसरकारी संस्था महासंघकी आरती पाठकलगायतले पत्रकार हत्याको विरोध गर्दै दोषीलाई कडा कारबाहीको माग गरेका छन्