सिस्नेरी सडकखण्डमा पहिरो, आवागमन पूर्णरूपमा अवरुद्ध

नेपाल कलम

१६ कार्तिक २०८२, शनिबार प्रकाशित

हेटौंडा/ मकवानपुरको इन्द्रसरोवर गाउँपालिका–३, ज्यामिरेस्थित कुलेखानी–सिस्नेरी–दक्षिणकाली सडकखण्डमा निरन्तर वर्षाका कारण ठूलो पहिरो खस्दा सडक पूर्ण रूपमा अवरुद्ध भएको छ।

मकवानपुर प्रहरीका अनुसार (आज) शनिबार साँझ ५:१५ बजे सडक खण्डमा पहिरो खसेपछि आवागमन पूर्ण रूपमा रोकिएको हो। पहिरो खसेको स्थान प्रहरी चौकी सिस्नेरीबाट करिब ३ किलोमिटर पश्चिमतर्फ पर्ने जनाएको छ।

सडक डिभिजन कार्यालयसँग समन्वय भइरहेको भए पनि पहिरो निरन्तर झरिरहेको कारण तत्काल सडक खुलाउने अवस्था नरहेको प्रहरीले जनाएको छ।

प्रहरीले सो मार्गमा यात्रा गर्ने सर्वसाधारणलाई हालका लागि फाखेल मार्ग प्रयोग गर्न अनुरोध गरेको छ।