अझ चिन्ताको विषय के छ भने यस्ता घटनामा नाबालकहरूको संलग्नता देखिन थालेको छ। यो दुवै पक्षका लागि गम्भीर संकेत हो। यसतर्फ समाज, अभिभावक र सरोकारवाला सबैले ध्यान दिन आवश्यक छ।

नेपालमा अर्को समस्या लागूऔषधको सजिलो पहुँच पनि हो। कतिपय ठाउँमा लागूऔषध सजिलै पाइन्छ। केही घटनाहरू त्यससँग पनि सम्बन्धित हुन सक्छन्, यद्यपि त्यसबारे अन्तिम सत्य प्रहरी र चिकित्सकको अनुसन्धानपछि मात्रै स्पष्ट हुन्छ। तर एउटा कुरा निश्चित छ—अत्यधिक उत्तेजना र नियन्त्रणहीन भावनाले कहिलेकाहीँ गलत दिशामा पुर्‍याउन सक्छ।

त्यसैले आजका अभिभावकहरूले बाहिरी दुनियाँसँग जति समय बिताउँछन्, त्यति नै समय आफ्ना सन्तानलाई दिन आवश्यक छ। उनीहरूको कुरा सुन्ने, बुझ्ने र सही–गलत छुट्याउन सिकाउने जिम्मेवारी परिवारकै हो।

पैसा कमाउनु महत्त्वपूर्ण हो, तर त्योभन्दा ठूलो कुरा आफ्ना सन्तानमा राम्रो संस्कार दिनु हो। आज धेरै परिवारमा अभिभावकबीचको सम्बन्ध पनि कमजोर हुँदै गएको देखिन्छ। सबैलाई एकैचोटि धेरै कुरा राम्रो बनाउने चाहना हुन्छ, तर त्यसको प्रत्यक्ष वा अप्रत्यक्ष असर कलिला बालबालिकाको मनमा परिरहेको हुन्छ।

दुर्भाग्यवश, धेरै अभिभावकले त्यो असर थाहा पाउँदा ढिला भइसकेको हुन्छ। त्यसैले समयमै सचेत हुनु, सन्तानसँग नजिक हुनु र उनीहरूको मन बुझ्नु आजको सबैभन्दा ठूलो आवश्यकता बनेको छ।