यसैबीच, गत भदौ १० गते रसुवाको टिमुरे क्षेत्रमा भएको दुःखद घटनाप्रति जेसीआई हेटौँडा लेडीले दुःख व्यक्त गर्दै दिवंगतप्रति श्रद्धाञ्जली तथा शोकसन्तप्त परिवारजनप्रति समवेदना प्रकट गरेको छ। घाइते तथा बिरामीहरूको शीघ्र स्वास्थ्यलाभको कामना गर्दै नेपाल जेसीजले प्रधानमन्त्री दैवी प्रकोप उद्धार, राहत तथा पुनःस्थापना कोषमार्फत १० लाख रुपैयाँ सहयोग गरिसकेको जानकारीसमेत दिइएको छ।

आयोजकका अनुसार देशभरका ८० भन्दा बढी जेसीज शाखामार्फत प्रभावित क्षेत्रमा राहत तथा सहयोग वितरण गरिएको छ। दिवंगत आत्माको सम्मान तथा पीडितप्रति ऐक्यबद्धता जनाउँदै भदौ २० गते बिहान ७ बजे हेटौँडामा शान्ति पदयात्रा आयोजना गरिने भएको छ। पदयात्रामार्फत शान्ति, सद्भाव, एकता र मानवताको सन्देश प्रवाह गर्ने उद्देश्य राखिएको आयोजकले जनाएको छ।

पत्रकार सम्मेलनमा जेसीआई हेटौँडा लेडीकी अध्यक्ष नम्रता श्रेष्ठ, पूर्वअध्यक्ष रश्मि बस्नेत तथा निवर्तमान अध्यक्ष अस्मिता न्यौपानेलगायतको उपस्थिति रहेको थियो।