हेटौंडाका १९ वटै वडाका इच्छुक खेलाडीहरू प्रतियोगितामा सहभागी हुन सक्नेछन्। १६ वर्ष उमेर ननाघेका र वडाबाट सिफारिस भई आएका खेलाडीहरूले मात्र भाग लिन पाउनेछन्। इच्छुक टिमहरूले फागुन ४ गतेभित्र नगर खेलकुद विकास समितिमा दर्ता गराउनुपर्नेछ।

प्रतियोगिताको विजेता टिमले नगद १ लाख रुपैयाँ पुरस्कार प्राप्त गर्नेछ भने उपविजेता टिमले ७० हजार रुपैयाँ पाउनेछ। व्यक्तिगत विधागत पुरस्कार अन्तर्गत सर्वाेतकृष्ट खेलाडिले ५ हजार, उत्कृष्ट फर्वाडरले १० हजार, उत्कृष्ट किपरले ५ हजार, उत्कृष्ट प्रशिक्षकले ५ हजार र उत्कृष्ट डिफेन्सरले ५ हजार नगद राशिको पुरस्कार प्राप्त गर्नेछन् ।

प्रतियोगिता सञ्चालनका लागि हेटौंडा उपमहानगरपालिकाले ७ लाख रुपैयाँ विनियोजन गरेको छ। खेल फिफाको नियमअनुसार नकआउट प्रणालीमा सञ्चालन हुनेछ।

गत असोज १२ र १३ गते मकवानपुरको इन्द्रसरोवर गाउँपालिका–३ सिस्नेरिमा गएको पहिरोमा परी एन्फा द्वारा सञ्चालित सिस्नेरीस्थित वात्सला देवी माविको प्रशिक्षण केन्द्रमा फुटबल प्रशिक्षण लिइरहेका १२ वर्षीय अनुपम घलानसहित ६ जना खेलाडीले ज्यान गुमाएका थिए।

शुक्रबार प्रतियोगिता घोषणा गर्न आयोजित पत्रकार सम्मेलनमा नगर खेलकुद विकास समितिका अध्यक्ष रविन्द्र घिमिरे, सदस्य यज्ञ बहादुर राई र सुनिल लोप्चनको उपस्थिति रहेको थियो।