उहाँले प्रजातन्त्र प्राप्तिका लागि गरिएको बलिदानको कदर गर्दै जनताको अधिकारको संरक्षण गर्नु सबैको जिम्मेवारी रहेको उल्लेख गर्नुभयो। साथै, लोकतान्त्रिक मूल्य, विधि र प्रक्रियालाई संस्थागत गर्दै समृद्ध नेपालको निर्माणमा सबै एकजुट भएर लाग्नुपर्ने आवश्यकता रहेको उहाँले बताउनुभयो।

मन्त्री श्रेष्ठले नेपाल कृषि प्रधान देश भएकाले कृषिमा आधुनिकीकरण, व्यवसायीकरण र नवप्रवर्तनमार्फत उत्पादन वृद्धिमा जोड दिनुपर्ने कुरामा पनि ध्यानाकर्षण गराउनुभयो। “कृषि र पशुपालनको प्रवर्द्धनबाट मात्र हामी आत्मनिर्भर अर्थतन्त्र निर्माण गर्न सक्छौँ। सरकार कृषकका हकहितका लागि प्रतिबद्ध छ,” उहाँले भन्नुभयो।

नेपालको लोकतान्त्रिक आन्दोलनले प्राप्त गरेका उपलब्धिहरूलाई जोगाउँदै राजनीतिक स्थायित्व, समावेशी आर्थिक विकास र सामाजिक न्याय सुनिश्चित गर्न सबै क्षेत्रका नागरिक, सरकार र सरोकारवालाहरूले हातेमालो गर्दै अगाडि बढ्नुपर्ने मन्त्री श्रेष्ठले जोड दिनुभएको छ।