उनले हालै सार्वजनिक तथ्याङ्कको हवाला दिँदै चालु वर्षमा १४ लाख २० हजार हेक्टर क्षेत्रफलमा धान रोपाइँ भई ५९.५५ लाख मेट्रिक टन उत्पादन भएको जानकारी दिए। औसत उत्पादकत्व ४.१९ मेट्रिक टन प्रति हेक्टर रहेको र यो अघिल्लो वर्षको तुलनामा ४.०४ प्रतिशतले वृद्धि भएको उल्लेख गर्दै उनले यसलाई कृषकको मेहनत र प्रविधिको योगदानको प्रतिफलका रूपमा व्याख्या गरे।

यद्यपि, देशले अझै पनि वार्षिक झण्डै १० लाख मेट्रिक टन धान आयात गरिरहनु परिरहेको अवस्थाले आत्मनिर्भरताको लक्ष्य हासिल गर्न थप प्रयास र समन्वय आवश्यक रहेको उनको भनाइ छ।

मन्त्री श्रेष्ठले आगामी दुई वर्षभित्र मुलुकलाई धानमा आत्मनिर्भर बनाउने सरकारको स्पष्ट योजना रहेको जानकारी दिँदै त्यसका लागि संघ, प्रदेश र स्थानीय तहको सहकार्यसँगै अनुसन्धान संस्था, निजी क्षेत्र र कृषक समुदायको सक्रिय सहभागिता अपरिहार्य हुने बताए।

शुभकामना सन्देशमार्फत मन्त्री श्रेष्ठले धान बालीको वैज्ञानिक प्रवर्द्धन, जलवायु अनुकूल प्रविधिको प्रयोग, कृषकको जीवनस्तर उकास्ने पहल र दीर्घकालीन खाद्य सुरक्षाका लागि सबै पक्षलाई एकजुट भएर अघि बढ्न आग्रह गरेका छन्।