कार्यक्रममा सह–सचिव डा. सम्झना कुमारी काफ्लेले नेपाल–चीनबीच भएको मासु निर्यातसम्बन्धी प्रोटोकलबारे कार्यपत्र प्रस्तुत गरिन् । उनका अनुसार चीनले निर्यात हुने मासु गुणस्तरीय, सुरक्षित र संक्रमणमुक्त हुनुपर्ने शर्त राखेको छ । मासु तीन वर्षभन्दा कम उमेरका राँगा–भैँसीबाट उत्पादन हुनुपर्ने, स्वीकृत वधशालामा प्रशोधन र प्याकेजिङ गर्नुपर्ने चीनको माग रहेको उनले बताइन् ।

त्यस्तै, पशु सेवा विभागका वरिष्ठ पशु चिकित्सक डा. मुकुल उपाध्यायले कार्ययोजना प्रस्तुत गरे भने पशु रोग अन्वेषण प्रयोगशाला प्रमुख डा. कृष्णराज पाण्डेले खोरेत रोगका चुनौती र रोगमुक्त क्षेत्र बनाउन आवश्यक प्राविधिक पक्षबारे जानकारी गराए ।

निर्देशनालयका निर्देशक डा. गौरीमान श्रेष्ठका अनुसार खोरेतमुक्त अभियानलाई सफल बनाउन सचेतनामूलक कार्यक्रमदेखि नियमित खोप अभियान सञ्चालन गरिनेछ । हरेक ६ महिनामा खोरेतविरुद्ध खोप लगाइने योजना रहेको उनले बताए ।

निर्देशनालयको तथ्यांकअनुसार चार पालिकामा हाल २ लाख ७७ हजार ३२१ पशु छन्, जसमा राँगा–भैँसी मात्रै ३० हजार ८२६ छन् । राँगा–भैँसी पालनका लागि उपयुक्त यी क्षेत्रलाई मासु उत्पादन जोन बनाएर चीनमा निर्यात गर्ने सरकारले तयारी गरेको हो ।