थाहा नगरमा एमालेको चुनावी तयारी तीव्र, ९१७ सदस्यीय निर्वाचन परिचालन कमिटी गठन

आगामी फागुन २१ गते हुने प्रतिनिधि सभा सदस्यको निर्वाचनलाई लक्षित गर्दै नेकपा (एमाले) थाहा नगर कमिटीले चुनावी तयारीलाई तीव्र पारेको छ । शनिबार थाहा नगरस्थित जेसिस हलमा सम्पन्न नगरस्तरीय विस्तारित भेलाले ९१७ सदस्यीय विशाल निर्वाचन परिचालन कमिटी गठन गरेको छ ।

भेलाले बलराम बलको संयोजकत्वमा निर्वाचन परिचालन कमिटी निर्माण गरेको हो । कमिटीको सह–संयोजकमा चित्रबहादुर बलामी, अच्युतम ढकाल र कल्पना बलामी चयन भएका छन् भने सचिवको जिम्मेवारी सुरेन्द्रमान प्रधानलाई दिइएको छ । स्वयंसेवक परिचालनको जिम्मा सुमन रायमाझीलाई, प्रचार कमिटीको जिम्मेवारी सुजन रायमाझीलाई तोकिएको छ । आर्थिक व्यवस्थापन कमिटी बिमल ढकालको संयोजकत्वमा गठन गरिएको छ भने बुद्धरत्न मानन्धरको संयोजकत्वमा १७ सदस्यीय अनुगमन कमिटी निर्माण गरिएको छ ।

यसैगरी थाहा नगरका १० वटै वडामा निर्वाचन परिचालन कमिटीका संयोजक र सह–संयोजकहरू तोकिएको एमाले निर्वाचन फोकल पर्सन आशिष अस्लामीले जानकारी दिनुभयो ।

भेलाका प्रमुख अतिथि एमाले नेता गोकुल बास्कोटाले प्रतिनिधि सभा सदस्यका उम्मेदवार महेश बर्तौलाको प्रशंसा गर्दै उहाँमा पूर्वसभामुख सुभाष नेम्बाङको झल्को देखिएको बताउनुभयो । कानूनको अध्ययन र अभ्यासमा दक्ष, मृदुभाषी र सभामुख तथा मन्त्री जस्ता जिम्मेवारी सहजै निर्वाह गर्न सक्ने क्षमता बर्तौलामा रहेको भन्दै उहाँलाई विजयी गराउन आग्रह गर्नुभयो । वर्तमान राजनीतिक माहोलले शिक्षित र सक्षम युवा नेतृत्व खोजिरहेको उल्लेख गर्दै पार्टीले बर्तौलालाई उपयुक्त जिम्मेवारी दिने विश्वास व्यक्त गर्नुभयो ।

कार्यक्रममा उम्मेदवार महेश बर्तौलाले छोटो कार्यकालमै जनसरोकारका विषय संसदमा प्रभावकारी रूपमा उठाएको दाबी गर्नुभयो । “संसद चल्दा संसदभित्र र नचल्दा जनताको दैलोमा छु,” उहाँले भन्नुभयो, “थाहा, भीमफेदी र राक्सिराङका भूगोलगत समस्या सरकारसम्म पुर्‍याउन मैले कुनै कसर बाँकी राखेको छैन।”

एमाले मकवानपुरका जिल्ला उपाध्यक्ष हिदम लामाले बर्तौलालाई एमबिबिएस, एमपिए र एलएलबी जस्ता उच्च शिक्षा हासिल गरेका योग्य युवा उम्मेदवारका रूपमा चित्रण गर्नुभयो । जातीय वा सम्प्रदायिक भ्रमबाट मुक्त भएर थाहा नगरको पहिचान र विकासका लागि बर्तौला नै उपयुक्त उम्मेदवार भएको उहाँको भनाइ थियो ।

भेलाकै अवसरमा नेपाली काँग्रेस परित्याग गर्दै ८६ वर्षीय वीरबहादुर गोले एमाले प्रवेश गर्नुभएको छ । लामो समय काँग्रेसमा आबद्ध रहनुभएका गोलेले एमालेको नीति र नेतृत्वप्रति विश्वास व्यक्त गर्दै पार्टी प्रवेश गर्नुभएको हो ।

भेलामार्फत एमाले थाहा नगर अध्यक्ष सुरेन्द्रमान प्रधानले आगामी माघ २० गते थाहा नगरका सबै वडामा एकैसाथ विस्तारित बैठक आयोजना गर्न निर्देशन दिनुभयो ।

कार्यक्रममा एमाले केन्द्रीय सदस्य भारती पाठक, प्रदेश कमिटी सदस्य बलराम बल, जिल्ला उपाध्यक्ष हिदम लामा, नेतृ कल्पना बलामी, रामहरी लामिछाने, अनेमसंघ जिल्ला सचिव सुशीला मल्ललगायत नेताहरूको उपस्थिति रहेको थियो ।

१९ माघ २०८२, आईतवार प्रकाशित

तपाईको प्रतिक्रिया