हेटौंडा–१० स्थित टिसीएन चौरमा जारी दोस्रो वृहत् खेलकुद, कृषि तथा पर्यटन महोत्सवअन्तर्गत मकवानपुर जिल्लास्तरीय पुरुष भलिबल प्रतियोगिता सुरु भएको छ। मकवानपुर जिल्ला खेलकुद विकास समितिको आयोजनामा तथा मकवानपुर जिल्ला भलिबल संघको सहकार्यमा प्रतियोगिता सञ्चालन गरिएको हो।
प्रतियोगिताको उद्घाटन खेलमा थाहा नगरपालिकास्थित मंगलेश्वर युवा क्लब र हेटौंडा–१५ को सफल केयर क्लबबीच प्रतिस्पर्धा भइरहेको छ।
आयोजक समितिका नरेन्द्र मोक्तानका अनुसार प्रतियोगितामा मकवानपुर जिल्लाभरबाट आठ टोलीको सहभागिता रहेको छ। क्वार्टरफाइनलसम्मका खेल ‘बेस्ट अफ थ्री’ र सेमिफाइनलका खेल ‘बेस्ट अफ फाइभ’ प्रणालीमा सञ्चालन हुने उनले जानकारी दिए।
प्रतियोगितामा थाहा–२ को मंगलेश्वर युवा क्लब, हेटौंडा–११ को छहारी युवा क्लब, मनहरी गाउँपालिकाको टोली, हेटौंडा–९ को पशुपति युवा क्लब, बागमती गाउँपालिका, थाहा–६ को नव प्रतिभा सांस्कृतिक युवा क्लब बज्रबाराही, हेटौंडा–१५ को सफल केयर क्लब, हेटौंडा–३ को मिलन युवा क्लबलगायतका टोली सहभागी छन्।
प्रतियोगिताको विजेता टोलीले एक लाख रुपैयाँसहित शिल्ड, मेडल र प्रमाणपत्र प्राप्त गर्नेछ भने उपविजेता टोलीले ५० हजार रुपैयाँसहित शिल्ड, मेडल र प्रमाणपत्र पाउनेछ। सेमिफाइनलमा पराजित हुने दुई टोलीले जनही १५/१५ हजार रुपैयाँसहित मेडल र प्रमाणपत्र प्राप्त गर्नेछन्।
त्यसैगरी प्रतियोगितामा सात विधाका उत्कृष्ट खेलाडीलाई नगदसहित मेडल र प्रमाणपत्र प्रदान गरिनेछ। सर्वोत्कृष्ट खेलाडीलाई पाँच हजार रुपैयाँ प्रदान गरिनेछ भने उत्कृष्ट लिब्रो, उत्कृष्ट स्पाइकर, उत्कृष्ट ब्लकर, उत्कृष्ट सर्भर, उत्कृष्ट प्रशिक्षक र उत्कृष्ट उदाउँदो खेलाडीलाई जनही दुई हजार रुपैयाँ नगद पुरस्कार प्रदान गरिने आयोजकले जनाएको छ।
यसैबीच, राष्ट्रिय महिला भलिबल प्रतियोगिता भने चैत ४ गतेबाट सुरु हुने आयोजकले जानकारी दिएको छ।
श्रमिक अधिकारको संरक्षण र रोजगारी विस्तारमा जोड: मुख्यमन्त्री बानियाँ
चितवनमा दोस्रो संस्करणको ‘चितवन अटो शो २०२६’ सुरु, ५० करोड कारोबार लक्ष्य
