कार्यक्रमका सभाध्यक्ष अधिकारीले प्लास्टिकजन्य तथा अन्य अजैविक फोहोरको उचित व्यवस्थापन वर्तमान आवश्यकता भएको बताउँदै “स्वच्छ, हरियाली र प्लास्टिकमुक्त हेटौंडा” निर्माणका लागि टोलस्तरबाट अभियानलाई निरन्तरता दिनुपर्नेमा जोड दिनुभयो।

प्रतियोगिताको नतिजाअनुसार कालिका टोल विकास संस्था प्रथम, विकास टोल (समूह ‘ए’) द्वितीय तथा मनकामना टोल (समूह ‘सी’) तृतीय भएका छन्। त्यसैगरी कालिका टोल (समूह ‘ए’), मनकामना टोल (समूह ‘बी’), बिन्दबासिनी टोल (समूह ‘ए’) र सृजना टोलले सान्त्वना स्थान हासिल गरेका छन्।

आयोजकका अनुसार प्रथम हुने समूहलाई १० हजार रुपैयाँ, द्वितीयलाई ७ हजार ५ सय रुपैयाँ, तृतीयलाई ५ हजार रुपैयाँ तथा सान्त्वना प्राप्त प्रत्येक समूहलाई २ हजार ५ सय रुपैयाँ पुरस्कार प्रदान गरिनेछ। पुरस्कारहरू विश्व वातावरण दिवस–२०८३ को अवसरमा जेठ २२ गते आयोजित विशेष समारोहमा वितरण गरिने कार्यक्रम रहेको छ।

कार्यक्रममा सहभागी टोल विकास संस्था, स्वयंसेवक तथा स्थानीयवासीहरूले वातावरण संरक्षण, फोहोर व्यवस्थापन तथा सरसफाइ अभियानलाई निरन्तरता दिने प्रतिबद्धता व्यक्त गरेका थिए। आयोजकले यस कार्यक्रमले समुदायस्तरमा वातावरणीय चेतना अभिवृद्धि गर्न महत्वपूर्ण योगदान पुर्‍याएको जनाएको छ।