राष्ट्रिय स्वतन्त्र पार्टीको केन्द्रीय सर्कुलरअनुसार कुनै क्षेत्रमा पार्टीका मन्त्रीहरू पुग्दा सम्बन्धित क्षेत्रका सांसदलाई जानकारी गराउने व्यवस्था रहेको गौतमले बताए। सोही सर्कुलरअनुसार आफूलाई मन्त्री यादव मकवानपुर आउने जानकारी रहेको उनको भनाइ छ।

तर, अनुगमनको समय र सुरक्षा व्यवस्थासम्बन्धी समन्वयमा भने ढिलाइ भएको गौतमले दाबी गरेका छन्। यस विषयमा उनले जिल्ला प्रशासन कार्यालय मकवानपुरका प्रमुख जिल्ला अधिकारीसँग समेत कुराकानी गरेका थिए।

प्रमुख जिल्ला अधिकारीले मन्त्रीहरू जिल्ला प्रवेश गरिसकेपछि मात्र केन्द्रबाट जानकारी प्राप्त भएको र जिल्लाको मातहतमा सुरक्षा व्यवस्थाका लागि तयारी गर्न भीमफेदी पुगेपछि मात्र जानकारी भएको बताएको गौतमले उल्लेख गरेका छन्।

सांसद गौतमले सामान्य समन्वयको विषयलाई तोडमोड गरी आफूलाई मन्त्रीको आगमनबारे कुनै जानकारी नै नभएको जस्तो देखाउने गरी भिडियो क्लिप प्रसारण तथा प्रचार गरिएको भन्दै त्यसप्रति आपत्ति जनाएका छन्। उनले घटनाको वास्तविकता बुझेर मात्र समाचार तथा सामग्री सम्प्रेषण गर्न आग्रह गरेका छन्।