उपमेयर राजेश बानियाको नेतृत्वमा सुरु भएको आन्दोलनमा १ देखि १९ वडासम्मका अध्यक्षहरू सहभागी छन्। उनीहरूले पहिलो चरणमा दुई दिनसम्म प्रशासन कार्यालय अगाडि सेवा प्रवाह गर्ने र त्यसपछि थप आन्दोलनको घोषणा गर्ने जनाएका छन्।

यसबीच जिल्ला प्रहरी कार्यालय मकवानपुरका प्रहरी निरीक्षक विश्व खड्काले भने, “यो एक जना वडा अध्यक्षको मात्रै नभई, सम्पूर्ण जिल्लाको सुरक्षाको विषय हो। हामी अनुसन्धानमा लागिरहेका छौं, अन्य संलग्न व्यक्तिहरूको समेत खोजी भइरहेको छ।”

तर, जनप्रतिनिधिहरूको आरोप छ— प्रहरीले आक्रमणकारी समात्न खोजेकै छैन। उनीहरूको शंका छ कि प्रहरी प्रशासन आक्रमणकारीसँग मिलेको हुन सक्छ।

यसअघि पनि हेटौंडाको मध्य बजारमा व्यवसायीमाथि दिउँसै भएको कुटपिटको घटनामा प्रहरीले प्रभावकारी अनुसन्धान नगरेको भन्दै व्यवसायीहरू आन्दोलित भएका थिए। यो सन्दर्भ जोड्दै जनप्रतिनिधिहरूले अहिलेको सुरक्षा अवस्था गम्भीर रूपमै खस्किएको टिप्पणी गरेका छन्।

वडाध्यक्षहरूको आन्दोलनले सेवाग्राहीहरूलाई पनि असर गरेको छ। टाढाबाट आएका सेवाग्राहीहरू प्रशासन कार्यालय अगाडि टेबल राखेर दिइएको सेवा पाउँदा सहज महसुस नगरेको बताउँछन्।

हेटौंडा–३ का बासिन्दा सविन घलान भन्छन्, “सरकारका जिम्मेवार जनप्रतिनिधिहरू नै आन्दोलनमा उत्रनुपर्ने अवस्था आएको छ। यस्तो दृश्य देख्दा हामी नागरिक चकित छौं।”

जनप्रतिनिधिहरूले प्रहरी र प्रशासनबाट न्याय नपाइने ठहर गर्दै वार्तामा नबस्ने निर्णय समेत लिएका छन्। उनीहरूले आन्दोलनलाई अझ सशक्त बनाउँदै लैजाने चेतावनी दिएका छन्।