बैठकलाई सम्बोधन गर्दै मन्त्री थापाले सुरक्षित आप्रवासन कार्यक्रमलाई थप परिणाममुखी र दिगो बनाउनुपर्नेमा जोड दिए। उनले वैदेशिक रोजगारीमा जाने श्रमिकहरूको अधिकार, सुरक्षा र सम्मान सुनिश्चित गर्न प्रदेश सरकार प्रतिबद्ध रहेको बताए।

उनका अनुसार कार्यक्रममार्फत श्रमिकहरूलाई सही सूचना, सीप र मनोसामाजिक सहयोग प्रदान हुँदै आएको छ, जसलाई स्थानीय तहसम्म संस्थागत रूपमा विस्तार गर्न आवश्यक रहेको छ।

बैठकमा स्वास्थ्य निर्देशनालय र स्वास्थ्य तालिम केन्द्रले मनोसामाजिक सेवा प्रवाह सम्बन्धी प्रगति विवरण प्रस्तुत गरेका थिए भने त्यसपछि सहभागीहरूबीच विस्तृत छलफल भएको थियो।

बैठकले सुरक्षित आप्रवासन कार्यक्रमलाई संस्थागत रूपमा मजबुत बनाउन आवश्यक कार्यविधि तयार गर्ने तथा आगामी आर्थिक वर्षका लागि बजेट विनियोजन सम्बन्धी सिफारिस गर्ने निर्णय पनि गरेको छ।

कार्यक्रममा प्रदेशका विभिन्न मन्त्रालयका प्रतिनिधि, स्थानीय तहका प्रमुख, जिल्ला प्रशासन कार्यालय मकवानपुरका प्रतिनिधि तथा विकास साझेदार संस्थाका प्रतिनिधिहरूको सहभागिता रहेको थियो।