संगीत क्षेत्रमा कृत्रिम बुद्धिमत्ता (एआई) को प्रभाव बढ्दै जाँदा यूएमजीको प्रदर्शनमा दबाब परेको विश्लेषण गरिएको छ । बजार हिस्सा घट्दै जानु र स्ट्रिमिङ सेवाको वृद्धिदर सुस्त हुनु पनि चुनौतीका रूपमा देखिएको छ । यसै कारण कम्पनीले गत मार्चमा अमेरिकामा सेयर सूचीकरण गर्ने योजना पनि स्थगित गरेको थियो ।

यो प्रस्ताव सफल बनाउन अकम्यानलाई यूएमजीका प्रमुख सेयरधनीको समर्थन आवश्यक हुनेछ । बोलोरे समूहसँग १८.५ प्रतिशत र भिभेन्दीसँग १३.४ प्रतिशत हिस्सा छ भने चिनियाँ कम्पनी टेन्सेन्ट पनि महत्वपूर्ण लगानीकर्ता हो । फ्रान्सेली अर्बपति भिन्सेन्ट बोलोरेको परिवारले कम्पनीको करिब ८० प्रतिशत मतदान अधिकार नियन्त्रण गरेको छ ।

अकम्यानले सन् २०२१ मै यूएमजीमा लगानी बढाउने प्रयास गरेका थिए । त्यसबेला उनको कम्पनीमार्फत यूएमजीलाई सार्वजनिक गर्ने योजना अघि बढाइएको थियो, तर अमेरिकी नियामक निकायको निगरानीपछि उक्त योजना स्थगित भएको थियो । त्यसपछि पर्सिङ स्क्वायर यूएमजीको प्रमुख लगानीकर्ता बनेको थियो र अकम्यान गत वर्षसम्म कम्पनीको बोर्ड सदस्यका रूपमा रहेका थिए ।

यूएमजीको सेयर मूल्य आईपीओपछि करिब एकतिहाइले घटिसकेको छ । यद्यपि विश्वभर संगीत आम्दानी बढ्दो क्रममा रहे पनि यूएमजीले सोनी म्युजिक र वार्नर म्युजिक जस्ता प्रतिस्पर्धी कम्पनीसँग कडा प्रतिस्पर्धा गर्नुपरेको छ । साथै, स्पोटिफाइ, अमेजन, एप्पल र डीजरसहितका स्ट्रिमिङ प्लेटफर्मको प्रभाव बढ्दै जाँदा संगीत उद्योगको परम्परागत संरचना पनि परिवर्तन भइरहेको छ ।

यसबीच एआईको विस्तारले संगीत सिर्जना, वितरण र आम्दानीको मोडेलमै असर पार्ने संकेत देखिएको छ । एआईबाट बन्ने गीतहरू र कपीराइटसम्बन्धी विवादले उद्योगलाई नयाँ चुनौतीतर्फ धकेलिरहेका छन् । यद्यपि, एक सर्वेक्षणअनुसार अधिकांश श्रोताले एआईबाट बनेका र मानवीय सिर्जनाबीच फरक छुट्याउन सक्ने देखिएको छ । प्रस्तावअनुसार पर्सिङको एसपीएआरसी होल्डिङ्स यूएमजीसँग गाभिनेछ र नयाँ कम्पनी अमेरिकाको नेभाडामा दर्ता भई न्यूयोर्क स्टक एक्सचेञ्जमा सूचीकृत हुने योजना रहेको छ ।-अलजजिरा