त्यस्तै, अभिनेत्री केकी अधिकारीको प्रस्तुतिमा ‘स्टेशन’ घोषणा गरिएको छ। सुपरहिट फिल्म ‘बोक्सीको घर’ टिमले निर्माण गर्ने फिल्मका लेखक/निर्देशक सुलक्षण भारती हुन् भने निर्मातामा बद्री अधिकारी छन्। यसको प्रदर्शन मिति भदौ १९ गतेलाई घोषणा गरिएको छ।

त्यस्तै, पूजा शर्माको प्रस्तुतिमा ‘रत्यौली’ घोषणा भएको छ। फिल्ममा विजय बराल र पूजा स्वयंको अभिनय रहनेछ। निर्देशन मुस्कान ढकालले गर्नेछन् भने निर्माण सुरज आचार्यको रहनेछ। विजय र पूजा पहिलोपटक एकसाथ देखिन लागेका हुन्।

त्यस्तै, निर्माता विनोद पौडेलले ‘दुई किनारा’ नामक नयाँ फिल्म घोषणा गरेका छन्। उनी ब्लकबस्टर फिल्म ‘पूर्ण बहादुरको सारंगी’ का निर्माता हुन्। उनको अर्को फिल्म ‘रोल नं. १’ जेठ १५ गतेबाट प्रदर्शनमा आउने तयारीमा छ।

यसैगरी लेखक तथा निर्देशक राजबहादुर सानेले ‘गंगा रानी’ घोषणा गरेका छन्। आहा फिल्म्स प्रालिको प्रस्तुति रहने फिल्मबारे अन्य विवरण खुलाइएको छैन। यस्तै, सम्पादक तारा थापा ‘किम्भे’ ले ‘सारथी’ नामक फिल्म घोषणा गरेका छन्।

निर्देशक जौन योञ्जनले ‘भगवान छ के छ ग्यारेन्टी?’ शीर्षकको फिल्म घोषणा गरेका छन्। स्मिता लामिछाने निर्माता रहेको फिल्ममा समाजको यथार्थलाई एउटा फरक दृष्टिकोणबाट प्रस्तुत गरिने बताइएको छ।

प्रदर्शन मिति घोषणा
नयाँ वर्षकै अवसर पारेर विभिन्न फिल्मका प्रदर्शन मिति पनि सार्वजनिक गरिएका छन्। जितु नेपाल अभिनीत ‘कार्की साइँला’ साउन १ गतेदेखि प्रदर्शनमा आउनेछ। यसको निर्देशक राजेन्द्र बस्नेत हुन्। यसको नयाँ पोस्टर समेत सार्वजनिक गरिएको छ।

त्यस्तै, निर्देशक माओत्से गुरूङको फिल्म ‘पेन्सन पट्टा’ भदौ २६ गते रिलिज हुने तय भएको छ। फिल्ममा दयाहाङ राई, गौमाया गुरूङ, विल्सनविक्रम राई, बुद्धि तामाङ लगायत कलाकारको अभिनय छ।

निर्देशक परिच्छेद सेनको फिल्म ‘महाराजधिराज’ मा पुष्प खड्का अनुबन्धित भएका छन्। यसअघि पल शाह रहने चर्चा भए पनि उनी बाहिरिएपछि पुष्प भित्रिएका हुन्। फिल्म विजयादशमीको अवसरमा प्रदर्शनमा ल्याइने जनाइएको छ। पुष्पलाई प्रस्तुत गर्दै फिल्मको नयाँ पोस्टर समेत सार्वजनिक गरिएको छ।

त्यस्तै अन्जन शर्मा र काजी लिम्बुको संयुक्त निर्देशनमा बनेको ‘जदौ’ को प्रदर्शन मिति घोषणा गरिएको छ। फिल्म भदौ १२ गते प्रदर्शनमा आउनेछ। फिल्ममा मुकुन भुसाल, ऋचा शर्मा, नीति शाह लगायत कलाकारको अभिनय छ। नयाँ वर्षको अवसर पारेर प्रदर्शन मिति घोषणा गरिएको हो।

त्यस्तै, अभिनेता सलिनमान बनियाँले लामो समयपछि कमब्याकको संकेत दिएका छन्। ‘ए मेरो हजुर २’ बाट डेब्यु गरेका उनले ८ वर्षपछि पुनः सक्रिय हुने संकेत सामाजिक सञ्जालमार्फत दिएका हुन्। उनी फिल्म ‘यात्रा’ पछि अन्य फिल्ममा देखिएका छैनन्।

उनले सामाजिक सञ्जालमा लेखेका छन्, ‘कहिलेकाहीं दूरी अन्त्य होइन, तयारी हुन्छ। नयाँ वर्षले केही पुराना रंगहरू फेरि जिउँदो पार्न खोज्दैछ।’

यसैबीच, नयाँ वर्षकै अवसर पारेर फिल्म ‘पहाड’ मंगलबारदेखि प्रदर्शनमा आएको छ भने गत शुक्रबार फिल्म ‘राम नाम सत्य’ रिलिज भएको थियो।

नयाँ वर्षको पहिलो दिनमै यति धेरै घोषणा हुनु, रिलिज मिति र फिल्मबारे अपडेट सार्वजनिक हुनुले नेपाली फिल्म क्षेत्र चलायमान रहेको संकेत दिन्छ।

तर, घोषणा भएका सबै फिल्म निर्माण र प्रदर्शन हुन्छन् कि हुँदैनन् भन्ने प्रश्न भने देखिन्छ।-सेतो पाटी