कुलेखानी–फाखेल–हुमाने–फर्पिङ सडकखण्डमा एक महिना अवरोध

इन्द्रसरोवर गाउँपालिका–२ र ४ अन्तर्गत महालक्ष्मी खोला क्षेत्रमा जेठ १५ गतेदेखि करिब १०० मिटर सडक ढलानको काम सुरु भएको छ। निर्माण कार्य सम्पन्न नहुन्जेल, अनुमानित एक महिनासम्म उक्त सडकखण्डमा सवारी आवागमन प्रभावित हुने प्रहरीले जनाएको छ।

यस अवधिमा कुलेखानी–फर्पिङ मार्ग प्रयोग गर्ने सवारीसाधनलाई कुलेखानी–सिस्नेरी–दक्षिणकाली वैकल्पिक मार्ग प्रयोग गर्न सुझाव दिइएको छ।

थानकोट–चित्लाङ सडक जेठ २९ सम्म पूर्ण बन्द

यस्तै, थानकोट–चित्लाङ सडकखण्डको पानीघट्टदेखि चित्लाङ बजारसम्म सडक सुधार तथा स्तरोन्नतिको काम भइरहेकाले उक्त सडक जेठ १७ गतेदेखि जेठ २९ गतेसम्म पूर्ण रूपमा बन्द गरिएको प्रहरीले जनाएको छ।

यस मार्गबाट यात्रा गर्ने सवारीसाधनलाई भैंसे–पालुङ–नौबिसे हुँदै त्रिभुवन राजपथ प्रयोग गर्न अनुरोध गरिएको छ।

सडक अवस्था बुझेर मात्र यात्रा गर्न आग्रह

जिल्ला प्रहरी कार्यालय मकवानपुरले निर्माण कार्यका कारण सडकको अवस्था दैनिक रूपमा परिवर्तन हुन सक्ने भएकाले यात्रामा निस्कनुअघि सम्बन्धित क्षेत्रको सडक अवस्थाबारे आधिकारिक जानकारी लिएर मात्र यात्रा तय गर्न सर्वसाधारणलाई आग्रह गरेको छ।

प्रहरीले वैकल्पिक मार्ग प्रयोग गरी सुरक्षित तथा सहज यात्रा गर्न सबै चालक र यात्रुहरूलाई सहयोग गर्न समेत अनुरोध गरेको छ।